Arratsaldeko zazpi terdietan botako dute 2026ko festak iragarriko dituen txupina Sanduzelai auzoan. Hortik aurrera jaiak hartuko du nagusitasuna auzoan. Euskalerria Irratian Maider Vicente sanduzelaiko bizilaguna elkarrizketatu dute (argazkian klik eginda entzun daiteke).
Aste honetan ere asteburuaren aurretik kultur ekimen ugari izan dituzue, montaketa lanetan ere ibili zarete... Nola joan da aurten prestaketa guztia?
Atzo zabaldu genuen karpa eta areto nagusia. Ekintza kultural gehiago izanen dira aurten bai haur zein helduentzat ere. Oso pozik gaude emaitzarekin.
Goizak erraldoi, gaitari, txistulariek dute hartua. Jendea erakartzen dute beti…
Haurrak erakartzen dituzte eta horrek dakar gurasoak ere hurbiltzea. Kale eta txokoak beteta izaten dira.
Nola dator asteburua?
Eguraldia lagun izatea espero dugu eta horrekin batera ekintza guztiak egin ahal izatea auzoko plaza desberdinetan. Jendea animatzea espero dugu,. beraz, ospatzea.
Musikak ere leku garrantzitsua izanen du eta… ibaia ere baliatuko duzue festen egitarauan, txipi txapa lehiaketa ikusi dugu.. baita ibaiertzean zirko kabaret ikuskizuna ere.
Bai. Aurten ibaiari eman dizkiogu ekintza gehiago. Txipi txaparen lehiaketak urte dexente daramatza eta jendea erakartzeko bidea izaten da. Zirkua ere inguru horretan jartzen dugu, leku polita eta atsegina izaten delako. Atzo ere, han izan zen antzerkia, festen iragarpen gisara.