Musika klasikoarekin lotua izan den arren, Eñaut Zubizarretak bere buruari ez ezik, publikoari erakutsi dio biolontxeloa kalera atera daitekeela eta bestelako soinuekin uztartu. Trigger izenaren azalean eta txeloa eskuartean arituko da gaur Aretxabaletako musikaria Zaldiko Maldiko elkartean.
Goi Mailako Musika ikasketak egin zituen musikariak, estilo klasikoan gainera, eta formakuntzako lau urteak amaituta, txeloarekiko harremana aldatu eta berrasmatu nahi izan zuen Zubizarretak: “Saiatzen naiz musika klasikotik aldentzen eta bestelako lengoaia bat erabiltzen”. Gaztetxeetan, tabernetan eta bestelako espazioetan jotzen saiatzen da, “jendea harritzen da, baina gustura hartzen dute proposamena”.
Gainera, horrelako espazioetan aritzea gustatzen zaio musikariari. Izan ere, dioen bezala, “askoz erosoago sentitzen dut nire burua horrelako espazioetan aretoetan baino”.
Gaurkoa, Zubizarretaren lanaren nondik norakoak ezagutzeko aukera izanen da, bere sorkuntzaren argazki bat egiteko aukera. Arratsaldeko 20:00etan izanen da emanaldia Zaldiko Maldikon, eta haren ondotik Markel Gomez BIDE entzuteko aukera izanen da.