Elkarteak ostegunekin antolatutako HOTSegunak zikloaren baitan Idoia Hernandez 'Hatxe' eta Ander Fernandez 'Nigara zuek' musikariak izango dira. Biek ala biek bestelako proiektuez gain, bakarkakoan ere aritzen dira eta bide horretan sortutakoak oholtzaratuko dituzte gaurkoan.
Tresneria guztiak jarriko ditu mahai gainean Idoia Hernandez Hatxek, diziplina anitzen uztarketa proposatzen du artistak emanaldian "jostari aritzeko". Fernandezek ordea, soinu esperientzia bat proposatzen du. Teatroa, poesia, zirkua eta dantza ikuskizunetan zuzeneko musikari eta sortzailea da Ander eta soinu bandak sortzen ditu. Bere banakako proiektuan horretatik edaten duela aitortu du. "Egiten dudan lanaren gainean ateratzen den txanpiñoia da Nigara zuek, guzti horrekin elikatzen den eta sinbiosian dagoen proiektua da", azaldu du Fernandezek. Izan ere, askotan bere proiektuak "itxoiten" egoten dira eta askotan, oporretan gainera, argitara ateratzen dira eta kantu bihurtzen ditu.
Bakoitzak bere bidetik joko duen arren, elkarlanean arituko direla iradoki du Idoiak, izan ere, bere azken lanaren produkzioan lagundu du Fernandezek. Hori ikusi eta entzuteko parada beraz, gaur arratsaldeko 20:00etan, Zaldiko Maldiko elkartean.