Lisciren Osasunak ezinean jarraitzen du etxetik kanpo. Datuak argigarriak dira: bost partidatan, zero puntu eta gol bakarra alde. Momentu honetan, Europako zifrarik txarrenak ditu bisitari moduan.
Larunbatean, 1-0 gailendu zitzaion Atletico Madril. Sergio Herrera ikusgarri aritu zen atepean, baina ezin izan zuen eragotzi Thiago Almadak 69. minutuan sartu zuen gola. Ordura arte, denetariko momentuak izan zituen Osasunak. Hasieran asko sufritu zuen, sendotzera egin zuen gero, eta markagailuan aurrea hartzeko aukera batzuk ere izan zituen.
Azkenean, ordea, logika gailendu zen Metropolitanon. Gorritxoek ligako talderik onenetako bat izan zuten aurrean, eta Simeoneren aldaketek hauspotuta, Atletico Madrilek bere egin zuen garaipena.
Hori bai, Osasunak urrezko puntu bat lortuko zukeen ate aurrean Budimirrek asmatu izan balu. Kroaziarrak oso aukera garbia izan zuen azken txanpan, baina Oblaken zango salbatzailearekin egin zuen topo.
Gauzak hala, sailkapenean 13. dago Osasuna, lehen bederatzi partidetan hamar puntu bilduta, eta datorren igandean Celta hartuko du Sadarren.
Emakumeen Osasunak, berriz, puntu bat eskuratu zuen Betisen aurka, golik gabeko neurketa batean. Denboraldiko lehen berdinketa izan zen Josu Dominguezen taldearentzat. Aurkari deseroso eta tematia izan zen Betis, baina irmoki erantzun zuten gorritxoek.
Gauzak hala, seigarren postuan iritsiko dira selekzioen partidek eragindako geldialdira. Azaroaren lehenean jokatuko dute hurrengo norgehiagoka, Taxoaren, Europaren kontra.
Horren guztiaren inguruan mintzatu dira Kirolerriko Osasun-etxean.