Japonian sortua. Hiru lerro besterik ez dituen poema txikia. Artefaktu poetiko labur bezala ere definitu du Josu Jimenez Maiak. Haikuaz ari gara. Hirugarrenez, propio sortutako haiku andana bildu ditu Errautsetan idatzitako haikuak liburuan Josu Jimenez Maiak. Denonartean argitaletxearekin kaleratu du eta Maite Ramosen ilustrazioez lagunduta dator. Urriaren 7an aurkeztuko du liburua Karrikirin, arratsaldeko 7,30ean. Aurretik Euskalerria Irratiko estudioan bisita egin digu gure kolaboratzaile eta gogoetalari den Josu Jimenez Maia idazlea.
Gerezi garaiko haikuak eta Orbel azpiko haikuak liburuak kaleratu zituen Josu Jimenez Maiak 2011 eta 2013an, hurrenez hurren. Ordutik ez du haikuak idazteari utzi eta euskarara itzuli ditu beste horrenbeste. Eta orain bere hirugarren haiku liburua argitaratu berri du: Errautsetan idatzitako haikuak.