Udazkenarekin batera UEUren ikastaro eskaintza berria iritsi da. Bi esparru desberdinetan egiten du lan erakunde honek. Batetik, haien sare propioetatik edota bazkideetatik iristen zaizkien proposamenen bitartez garatzen duten eskaintza eta bestetik, Nafarroako Gobernuarekin elkarlanean antolatzen dituztenak.
Azkeneko alor honetan kokatzen dira UEUk eskainiko dituen lehenengo lau ikastaroak. Asier Urio NUPeko irakaslearen eskutik Adimen artifiziala ikas-irakaskuntza prozesuetan izeneko lantegia eskainiko da. Tutore eta laguntza-irakasleen arteko elkarlana jarriko du erdigunean Javier Monzonek. Bestetik, Sexuen hezkuntza gaurko erronken aurrean proposamena prestatu du Itsaso Bakedanok. Eta Nagore Zamarreñoren bitartez, Emozioen garapen osasuntsua sustatzea izango dute helburu antsietateari aurre egiteko.
Jaso Ikastolan izango dira, irailaren 27 eta urriaren 4an. Izena emateko epea irailaren 23an bukatuko da. Informazio guztia www.ueu.eus webgunean eskuragai.
Edurne Koch, UEUko Nafarroako arduraduna elkarrizketatu dugu Euskalerria Irratian, ikastaroen nondik norakoak ezagutzeko.