Labak irailaren 1ean ireki zituen berriro ateak. Garai berri honen ezaugarri nagusietako bat kalitate teknikoan emandako jauzia izanen da. Nafarroako lehenbiziko entzuteko taberna edo listening bar Laban dago eta Ultzamako tailer batean sortu dira bertako bozgoragailuak eta amplifikadoreak.
Iñaki Larraiotz 2021ean Larra soinu tresnak estudioa sortu zuen, musika-ekipoak konpontzeko eta fabrikatzeko. Bide berri honetan, Labako kideen deia jaso zuen espaziora egokitutako soinu sistema berezia sortzeko. "Ez nuen ezagutzen listening bar kontzeptua. Labatik planteatu zidatena espaziora egokitutako kalitate handiko soinu ekipo bat zen eta hori egin dugu." Ekipo hori eskuz egina da, Ultzamako oholekin. "Banituen haritz taula berezi batzuk gordeta estudioan eta pentsatu nuen hau zela erabiltzeko aukera egokia."
Labak bide berri honetan euskal kultura-eskaintza indartzea eta sortzaileek haien proiektuak erakusteko gunea izatea du helburu.