Urteroko gogoeta uztailaren 7an. 2008an duela 17 urte Jose Diego Yllanesek Nagore Laffage erail zuen, eta duela 9 urte, 2016an, La Manada talde bortxaketa gertatu zen sanferminetan. “Bi gertaera oso berezi izan dira gaurko egunarekin, jaiak hasi eta berehala horrelako kasu bortitzak egotea oso gogorra eta mingarria delako”, gogora ekarri du Iratxe Alvarez mugimendu feministako kideak.
Espazio publikoak okupatzera dei egin dituzte emakumeak aurten. Argi zabaldu du mezua Alvarezek: “Badirudi emakumeok ez dugula eskubiderik jaiak gizonek bezala bizitzeko eta horregatik dei egiten dugu espazioak okupatzera, jaiak ere gureak direlako. Ez gara inora joango eta jaiaz gozatzeko eskubidea dugu”.
Duela hainbat urte Gora Iruñearekin batera erasoen aurkako protokolo bat diseinatu zuten eta “indarkeria forma berriak” agertu diren moduan, protokolo berri baten beharra ikusi dute.
Protokoloa oso zabala da: aldez aurretiko sentsibilizazioa; gerora arreta, egun, zerbitzu publikoek kudeatzen dutena mugimendu feministaren lanari eske. “Kalitatezko eta doako zerbitzu bat izatea emakumeontzat” aurrerapausoa dela dio Alvarezek. Eta, azkenik erantzun protokoloa, eraso baten aurrean nola erantzun zehazteko.
Alvarezek gogorarazi du eraso guztiak eraso direla. Orain, gainera, “legeak ere onartzen du guztiak direla erasoak”, noski, ez dira berdinak eta bereizi behar dira, “bakoitzak erantzun eta zigor bat behar duelako”.
Hala ere, ohartarazi du, “feminismoak aurrera egiten duen bakoitzean beti badago sektore bat atzera doana eta horrek erakusten du ongi ari garela eta asko dagoela egiteko oraindik ere”.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!