Duguna dantza taldekoek 09:30etan hasi dira egoitzaren aurreko kalera mahaiak ateratzen eta bertan gosaldu dute. Aurreko urtean txupinazoa bota zuten eta egun horretako oroitzapen eta sentsazioekin gorputzean “denborarekin barneratu ahal izan dugu eta geratu zaiguna zapore goxoa izan da” Aritz Ibañez-en hitzetan.
Txupinazoa eta gero zuzenean Foru plazan egingo den folklore jaialdira joango dira. Urtero bezala, 13:30etan Dugunako dantzariak Muthiko Alaiak, Oberena, Ortzadar, Txori Zuri, Amaiur, Ardantzeta, Basakaitz, DanTXaldi, Eluntze, Harizti, Iruña taldea, Larratz eta Mikelats dantza taldeak arituko dira. Otsagabiko dantzak eta Lapurdiko iñauteriak dantzatuko dituzte eta, horren ondotik, jendea gonbidatuko dute Larrain dantzara.