Joseba Koldo Ortegak bere azken eleberria igo du Booktegi liburu digitalen plataformara. Awa eta Binata, jazarpen amaigabean eleberriak, bi protagonistek Senegaletik Europara egindako bidaia kontatzen du. Egileak berak azaldu moduan, "bertako bizimodu alienagarritik ihes egin ondoren bi lagunek Iruñean topatuko dute behin-behineko aterpea. Bertako jendarteko babesgabeenak ezagutzean, ustelkeria kasu baten lekuko izateagatik zelatatuak eta jazarriak izanen dira eta Baztanen erdietsiko dute laguntza. Hala ere, beraien bizitza kinka larrian egonen da berriro, lagunen sorospenaz hiltzaile bihozgabe baten hatzaparretatik libratzeko".
Eleberri beltzaren generoan kokatzen den eleberriak, hartara, zapalkuntza desberdinek zeharkatzen dituzten pertsonaiei eman nahi izan die protagonismoa, "beltz izateagatik, etorkinak izateagatik eta emakume izateagatik" jasaten baitute indarkeria. "Gai nagusia emakume migratzaileek askotan sufritzen duten jazarpen soziala eta sexuala da. Bestalde, gehiegi sakondu gabe, etxebizitzaren inguruko arazo soziala azalduko da: Iruñerrian hirigintza-ustelkeriaren testigantza eta Baztan-Iparraldean turismoak eragindako desoreka sozio-ekonomikoa".
Awa eta Binata booktegi plataforman dago eskuragarri, egileak zehaztu bezala, suspentsea eta eleberri beltza gustatzen zaien irakurleentzat aproposa.