Mende erdi, 50 urte, erraz esaten da. Idatzi eta jaso ordea, lan luzea izan da. 300 orrialde baino gehiago beharrezkoak izan dira Iruñeko Alde Zaharraren bihotza eta birika den auzo mugimenduaren ibilbidea islatzeko. Helena Bengoetxeak hartu du hitzak aukeratzearen ardura, testigantza, elkarrizketa eta askotariko dokumentuak beharrezkoak izan dira horretarako. Beti ere, AZ ekimenaren laguntza eta babesean garatu du proiektua.
Zaila da data jartzea auzo mugimenduaren sorrerari, askok baitiote betidanik izan dela. Hirigintza aldatu, saltokiak itxi, tabernak zabaldu, irisgarritasuna hobetu, espazio publikoak eraldatu… Hamaika aldaketa izan ditu auzoak baina zerbait ez da aldatu: “sentimendu komunitario hori hasieratik egon da, herri txiki bat izango balitz bezala”.
Bengoetxeak azaldu bezala, “gaur egun, Iruñeko auzoen artean sentimendu hori indartsuen mantentzen duen auzoetako bat da”. Eta auzoko gazte mugimenduak esaten duten bezala, “barrionalistak” dira.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!