Ana Galarraga: “Frankensteinek erakusten digu zientziaren izenean ez duela denak balio”

Unai Lako Goñi 2025ko ots. 24a, 18:41

Zinema eta Zientzia zikloaren barruan Frankenstein izango dute hizpide Ana Galarraga zientzia dibulgatzailearekin

1818an idatzi zuen Mary Shelleyk Frankenstein eleberria. Zientzia-fikziozko lehenengo nobela izan zen, zientzia erdigunean jarri zuena eta galdera asko airean uzten zituena: Non daude zientziaren mugak? Nor da munstroa? Nor da sorkariaren ekintza zitalen erantzulea? Zerk bultzatzen ditu gizakiak eta izakiak gaiztakeriara?

1931n iritsi zen eleberrian oinarritutako izenburu berdineko filma. Eta laur urte geroago, 1935ean The Bride of Frankenstein. Biak ikusiko dira asteartean Golem Baionan Zinema eta Zientzia zikloaren barruan. Proiekzioaren ostean Ana Galarraga zientzia dibulgatzailearekin solasaldia egingo da.

Filmek ia 100 urte dituzten arren, ez dute gaurkotasuna galdu. Eta gaur egun zientziaren inguruan sortzen diren eztabaida sutsu berberak uzten dituzte agerian: zientziaren izenean dena baimenduta dago? Arau amankomun batzuk zehaztu behar dira ezer probatu edo esperimentatu aurretik?

Bestetik, desberdina dena edo desberdin iruditzen zaiguna nola tratatzen dugun. Frankensteinek ez baitzuen hautatu horrela izatea, halaxe sortu zuten. Filmak ikusterakoan ere beldurraz, minaz, erruaz, ulertezintasunaz, edo onarpen ezaz ere egin daiteke gogoeta.

Honetaz guztiaz hitz egiteko Ana Galarraga gonbidatu dugu Irrintzi Plazara.

Zinema eta zientzia zikloaren hurrengo zita, otsailaren 25ean, asteartea, arratsaldeko 7etan Golem Zineman, Ana Galarraga eta Frankenstein filmarekin.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!

Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!