Mejillon Tigre kolektiboak Hitz esana emanaldia ekarriko du gaur Iruñera, Geltokiko Gastro Showaren eskutik. Errezitaldiaz gain, publikoak Geltoki Tabernak Anizko Jauregia Esnekiak proiektuko produktu ekologikoekin egindako 4 pintxo dastatu ahal izango ditu.
Spoken word formatua darabilen poesia-emanaldia da Hitz esana, Eider Adeletxerekin batera kolektiboa osatzen duen Ane Zubeldiak argitu moduan. Bi gorputz, 15 bat pieza indibidual, eta poesia emanalditik baino kontzertutik gertuago egon nahi duen formatua. "Esateko ez baita gauza handirik behar: jasotako guztiarekin eta horren kontra aritzea. Zeharkatzen gaituzten bizipenak piezen muinean kokatzea: etxebizitza, sexu-indarkeria, gorpuztasuna, idoloak, erreferenteak. Hitz soilak eta, noizbehinka, musika nahasian, esandakoa eta beste guztia ere hel dakion entzuleari".
