Oroz gainetik, azken ehun urteetako Euskal Herriko kronika politiko bat. Halaxe definitzen du Eneko Bidegainek argitaratu duen azken liburua: Kepa Anabitarte: bizitza bat herriari eskainia. Biografia, pentsamendu politikoa eta historia eskutik doaz lan honetan, non Anabitarteren bidean gurutzatu diren hainbat eta hainbat erreferentziazko lagun eta gertakari politiko, ekonomiko eta kultural agertzen zaizkigun. Egileak gaur aurkeztuko du liburua, Naroa Anabitarte biografiaren protagonistaren alabak lagunduta, Iruñeko Karrikiri dendan.
Kepa Anabitarte (Pasaia, 1934) Euskal Herriaren askatasun egarriak mugitu du bizitza osoan. Familia euskaldun eta abertzale batean sortu zen Trintxerpe auzoan, langileen borroken eta zapalkuntza gogorraren testuinguruan. Gazte-gaztetatik ohartu zen Euskal Herriaren menderakuntzaz, eta berehala hartu zituen ardurak, herriaren askapena helburu.
ELA sindikatuan hasi zuen ibilbide militantea, eta kartzelan egon zen hargatik. Municheko 1962ko kongresuaren ondoren, sindikatuaren lehen zatiketa handiaren eragileetako bat izan zen, herriaren askatasunera heltzeko bideei eta analisiei zegozkien funtsezko desadostasun politikoen ondorioz. ELA-berri taldeko arduradun izan zen geroztik. ESB alderdiaren sorreran ere parte hartu zuen, kooperatibismoan aritu zen, Gipuzkoako industria guneetako arduradun izan zen, Nabarralderen bultzatzaileetako bat, Orreaga iritzi taldeko kide, Gara egunkaria argitaratzen duen EKHE SA-ko lehendakari, eta abar.
Kepa Anabitarteren biografia hau Euskal Herriko azken ehun urteetako kronika politiko bat da, oroz gainetik. Bidean ezagutu dituen hainbat eta hainbat erreferentziazko laguni buruz eta gertakari politiko, ekonomiko eta kulturalez ari da liburua, bide horretan osatu duen pentsamendu politikoaren oinarriak azaltzeaz gain.