Ia mende erdi inguru darama Euskal Herrian Euskaraz taldeak euskararen alde tokian toki antolatzen. Berriki 45 urteko ibilbidea bete dute eta iaz berrabiaratu zuten ‘Euskaraz bizi eguna’ ospatzeko baliatuko dute, larunbatean, egun osoko egitaraua antolatu dute Iruñean.
Sarai Robles, Beñat Astiz eta Bittori Elizalde izango dira bertsotan eta Peio Ardaizek oinak jarriko dizkie. Bingo musikatua eta euskaraokea Zaldiko Maldikon, eta iluntzean Zinez taldearen kontzertua Aitzinan.
Gainera, Sortzenek abian jarritako arrazakeria eskoletatik ezabatzeko kanpainarekin bat egin dute, eta egitarauaren zati bat, elkarlanean sortu eta partekatuko dute. Jaia eta borrokaren ereduarekin bat egitera animatu dituzte Iruñerriko euskaldunak.
