Eguberri abestiei dagokienez Euskal Herrian "altxor bat" daukagula dio Juantxo Zeberio musikariak. Txikitatik etxean eta kalean ikasitako abesti horiek berreskuratzeko ahalegina egin zuen duela jada 11 urte plazaratu zuen Umama diskoan, eta ahalegin horri tiraka orain bigarren lan bat osatu du: Eguberri umama. Orduko abestiei beste batzuk gehitu eta 17 kantaz osatutako diskoa ondu du.
Zeberiorentzat "erronka bat" ere izan zen aurreko diskoaren bidetik aldendu gabe ekarpen berri bat egitea kantuei dagokienez, baina lortu duelakoan dago. Horretarako, ondoan izan ditu Oñatiko ganbara abesbatza, Laskorain Abesbatza, Iruñeko Paz de Ziganda ikastolako abesbatza, Ibil Bediko Amets Aranguren eta Mirua taldeko Malentxo Zeberio abeslariak eta jazz eta hari laukote bat.
Astelehenean, Eguberri umama oholtza gainera eramanen du Zeberiok. Gaiarre antzokian izanen da emanaldia, arratsaldeko 19:00etan.
