Ana Ollo Euskara kontseilaria Sarean Euskaraz jardunaldietan izan da bisitan eta hauen garrantziaz mintzo da Euskalerria Irratian. “900 gazte biltzen dira euskara, teknologia berriak eta gazteak lotzen dituen programa batean”, hori baita Foru Gobernuaren apustuetako bat. “Euskararen erabilera sustatu nahi dugu baina betiere ongi pasatuz”, gaineratu du kontseilariak.
Gazteak sarean ibiltzen dira eta Ollok emandako datuen arabera gazte nafarren %25 euskaldunak dira eta %10 moldatzen dira euskaraz. Beraz, sarean euskaraz ibiltzeko beharretik abiatu zituzten jardunaldiak.
Kontseilariak azaldu bezala, “gure arlo estrategikoan gazteak oso inportanteak dira”. Hartara, “jardunaldietan nahi dugu gazteek ikusi dezaten zenbat jende dagoen sarean euskaraz. Erakutsi nahi diegu oso eduki politak eta interesgarriak daudela euskaraz; erreferenteak eman nahi dizkiegu”.
Hori horrela, formakuntza ezinbestekotzat jotzen du Nafar Gobernuak. “Erakutsi behar diegu nola mugitu sare sozialetan, tresna oso baliagarriak eta interesgarriak dira baina arrasto asko uzten dute eta horrekin ere kontuz ibili behar da”, aipatu du Ollok.
