Uztailaren 8an, 23:45ean, Zetak taldeak kontzertua emanen du Gazteluko Plazan. Proiektuaren bosgarren urteurrena ospatze aldera urtarrilaren 3an eta 4an eginen duen Mitoaroa ikuskizuna iragarri zuenetik, Pello Reparaz emanaldiaren sorkuntza prozesuan murgilduta dabil. Sanferminetakoa, alta, udarako agendan markatuta daukan hitzordu urrietako bat izanen da, "garrantzitsuenetakoa, zalantzarik gabe". "Zetak proiektu nafarra da, eta nafarrak garen aldetik sanferminak oso bereziak dira guretzat".
Gazteluko Plazako egitarauari dagokionez, Reparazen aburuz bertako taldeen aldeko apustua egitearekin asmatu da: "Gero eta globalizatuagoa dagoen mundu honeta, gero eta bereziagoa da bertakoa, gero eta balio handiagoa du". Hartara, gaur egun proiektu oso interesgarriak daudela ere azpimarratu du Arbizuko musikariak: "Polita izango da ikustea nola bertako proiektuek, proiektu nafarrek eta euskaldunek, Gazteluko Plaza beteko duten".
