Reparaz, proiektu berri batekin
Pello Reparazek primizia bat emanen du elkarrizketan, proiektu berri bat iragarriko baitu. Bestalde, Labara joanen da baieztatu berritan uztailaren 8an Gazteluko plazan bertan joko duela, sanferminetako oholtza nagusian.
Euskoprincess, Zikuñagako glamourra
Euskoprincess artista hernaniarra oso denbora gutxian itzal handia lortzen ari da Euskal Herriko hiri musikaren eszenan. Duela urtebete karrikaratu zuen bere lehen kantua, Rivers Zk ekoizturiko Lehendakari. Jarraian, lehen EPa heldu zen: Hollywood star system. Hau da, Hollywooden bertsio glamourrez betea, Hernaniko Zikuñaga auzoan sortua. Hortik abiaturik, bere ikuskizunetan oso giro berezia sortzen du, energiaz eta askatasunez beterik.
Eneko eta Danel, bigarren denboraldirako prest
Euskalerria Irratiak ekoizturiko Flop Kultura saioak bigarren denboraldi bat izanen du. Eneko Garciak eta Danel Pascualek egiten dute saioa, hurrenez hurren Albina Stardust eta Divina Comedia drag queenen gibelean dauden artistek. Haien hitzetan, “bi trabesti eszeptikoren pop kulturaren inguruko ikuspuntua” ematen dute saioan. Lehen denboraldian 35 saio egin dituzte, arrakasta handiz, eta, besteak beste, Izaro, Yogurina Borova eta Ane LIndane bezalako gonbidatuak izan dituzte. Irailean itzuliko dira, saio eta gonbidatu gehiagorekin.
