Ez naiz inoiz Dublinen egon antzezpena oholtzaratuko da gaur Gaiarre antzokian, iluntzeko 20:00etan. Markos Goikoleak idatzi du obra eta Aitziber Garmendia, Mireia Gabilondo, Iñigo Aranburu eta Iñigo Azpitarte arituko dira aktore lanetan. Gabilondok berak zuzendu duen komedia honek famila baten gora-beherak ditu hizpide. Elena, alaba gazteena, Londrestik itzuliko da, hiru urtean harremanik izan gabe egon eta gero, eta, azkenean, Eguberri-gaua elkarrekin ospatuko dute. Hala ere, Elena ez da bakarrik etorriko, Cindyrekin baizik, denek ezagutu nahi duten irlandar neska-lagun ikusezina
Tentazioa Produkzioak taldeak ekoiztutako obraren eszenografia Fernando Bernuesen eskutik joan da. Generoari dagokionez, komediaren kodeak erabiltzen dituen obra dela azpimarratu du Gabilondok: "Komedia absurdoa da obra honetan erabiltzen dena, pertsonaia ikusezin bat egotetik abiatzen den absurdoa; eta erritmoa azkartzen doa obrak aurrera egin ahala, pertsonaia guztien sekretuak azaleratzen doazen heinean".
Gaiarre antzokiko webgunean eskuratu daitezke gaurko emanaldirako gelditzen diren azken sarrerak.
