Euskal Herriko antzokietan barrena ematen ari diren biraren eskutik, Neomak taldeak kontzertua emanen du larunbatean, iluntzeko 20:00etan, Iruñeko Gaiarre antzokian. Lehenengo aldia izanen du talde gipuzkoarrak antzoki iruindarrean eta, hartara, "gogotsu eta ilusioz" datozela aitortu digu Leire Etxezarreta taldekideak. Sarrera guztiak dagoeneko agortu dira.
Kepa Junkeraren ingurumarian elkartu ziren gaur egun Neomak taldea osatzen duten zazpi gazte gipuzkoarrak, orduko hartan Sorginak izenarekin. Urteekin proiektua indartuz joan da, musika garaikidearen soinuetan murgilduz, sustraiak trikitixaren munduan ongi errotuta mantendu bitartean. Tradizioa eta berrikuntza eskutik doaz Neomaken musikan eta irudian. Eneritz Aulestia, Alaitz Eskudero, Leire Etxezarreta, Irati Gutierrez, Maria Lasa, Amets Ormaetxea eta Garazi Otaegik osatzen dute Neomak.
