Santas Pascuas musika jaialdiaren eskutik, Verde Pratoren kontzertua izanen da ostegunean Iruñeko Zentral aretoan, Jimena Amarilloren emanaldiarekin batera. Verde Prato proiektuaren atzean dagoen Ana Arsuagak azaldu moduan, kontzertuan azken diskoko kantuak interpretatuko ditu, pop elektroniko kutsuko Adoretua lanekoak.
Adoretua diskoa Bilboko El Tigre estudioan grabatu zuen Arsuagak, Jon Agirrezabalaga soinu teknikariarekin. Orotara, erritmo markatuko zazpi abesti biltzen ditu lanak, horietako batzuk regetoiaren generoaren baitan ere klasifikatu daitezkeenak.
Zentraleko emanaldia iluntzeko 20:30ean hasiko da eta ordu erdi lehenago zabalduko dira aretoko ateak. Sarrerak oraindik eskuragarri daude Zentraleko webgunean, baita bertako leihatilan ere.
