Iruñeko Komunikabideak Fundazioak 'Bostekoa' Saria sortu du, euskararen aldeko jokamoldea erakusten duten lagunak omentzeko helburuarekin. Saria, Jagoba Arrasate Osasunako entrenatzaileari ematea erabaki dute. Sari-ematea heldu den azaroaren 15ean izanen da, arratsaldeko 7etan, Iruñeko Civican aretoan. Ez da sari-emate ekitaldi hutsa izanen. Jagoba Arrasaterekin solasean aritzeaz gain, musika, irudia eta bertsoa ere ez dira faltako. Sarrera librea da, aretoa bete arte. Izena aurrez eman beharra dago honako esteka honetan klikatuz:
Kike Diez de Ulzurrun, Iruñeko Komunikabideak Fundazioko kidearen esanetan “Jagoba Arrasate euskaldun eta euskaltzalea dugu, Iruñera etorri zenetik euskaraz egin du, naturaltasunez: prentsaurrekoetan, ekitaldi publikoetan, ospakizunetan, entrenamendu eta partidetan ere”. Bere ustez, pertsona estimatua, umila eta normala da, hortik gutxi duen futbol munduan. IKF Fundazioak nabarmendu duenez “begibistakoa da futbolak eragin handia daukala gure gizartean, eta Osasuna dela nafarrok batzen gaituen sinbolo nagusienetarikoa. Hori dena kontuan harturik, oso pozgarria da Arrasateren jokamoldea, euskarari ospe, bultzada eta ikusgarritasuna ematen baitizkio”.
