Erriberriko antzerki jaialdiaren 24. edizioa abiatu da gaur, eta abuztuaren 6ra bitartean musika, dantza, zirku eta antzerkia bilduko dituen diziplina anitzeko programazioa eskainiko dute aurten ere. 22 obra aurkeztuko dituzte 39 emanalditan ikusgai egongo direnak eta horietatik, 13 obra emakumeek sortuak dira. Maria Goiricelayarekin batera bigarrenez jaialdiaren zuzendaritza artistikoaz arduratzen da Ane Pikaza.
Parekidea, inklusiboa eta intergenerazionala izango da aurtengo edizioa; izan ere, ibilbide luzeko artistak artista gazteekin topatzeko aukera eskainiko du. Askotariko gaiak jorratuko dituzte ikuskizunak eta zentsurari aurre eginda, haien artean, Burgosen zentsuratu zuten El mar: visión de unos niños que no lo han visto nunca Xavier Bobések eta Alberto Conejerok zuzendutako lana. Bestalde, euskarazko eskaintza bakarra egongo da jaialdian: Lore More konpainiaren Trapu Zikinak antzezlana.
