Albistearekin “harrituta” daude LAB sindikatuko ordezkariak. Azken bi urteetan 400.000 euroko diru galera izan dutela aipatu die Navarra Sin Fronteras erakundea kudeatzen duen enpresak, eta aurten 500.000 eurokoak aurreikusten dituztela. Egoeraren aurrean erabaki “irmoa” hartu du enpresak: jarduera etengo dute. Hainbat galdera sortu zaizkio, ordea, LAB sindikatuari: “Zergatik ez ziguten egoeraz ohartarazi? Zergatik ez dute neurririk hartu egoera bideratzeko?”.
Atzo elkarretaratzea egin zuten langileek, hain zuzen, bideragarritasun plan bat eskatu eta enpleguak suntsitu ez daitezela eskatzeko. Enpresaren kontu ekonomikoak aztertuko ditu sindikatuak. Aurkituko dutenaren hipotesi bat dutela azaldu du Euskalerria Irratian Oihan Ataun eremu sozio-sanitarioko arduradunak: “Progresiboki desegin dute aktibitatea egoera honetara iritsi arte”.
Zailtasun-egoeran dauden pertsonen gizarteratze integrala helburu, hamabi arreta programatik gora kudeatu ditu. Gobernuak gizarte zerbitzuak bermatuko dituela ziurtatu du, baina LAB sindikatuak ohartarazi du “plantillaren zati bat ez dagoela pleguetara atxikita”. 129 lagunek egiten dute lan Navarra Sin Fronteras-en.
Egoerak gizarte-zerbitzuak publiko egitearen beharra utzi du agerian sindikatu abertzalearen aburuz: “Funtsezko gizarte-zerbitzuen kudeaketa pribatizatuz, horrelako egoerak gertatzea errazten da”.
Argazkia: LAB sindikatua