Navarra Suma koaliziorako txosten bat udal baliabideekin eta lan ordutegian egin zutela salatu zuen apirilean EH Bilduk. Metadatuak aztertuz aurkitu zuten ustezko kasua, atzerapenak susmorik txarrenak berresten ditu Garbiñe Bueno zinegotziaren ustez.
Gobernu Estrategikoaz arduratzen den Ana Elizalde alkateordearen sailak hamar egun balioduneko epea izan du batzordea eratzeko beharrezkoak diren hiru txostenak aurkezteko – juridikoa, teknikoa eta genero-eraginari buruzkoa –. Epea igaro da, eta dokumenturik ez dute entregatu. Lau aldiz eskatu dute informazioa, gehienetan ez dute erantzunik jaso, eta atzerapena euskarazko itzulpen batengatik eman dela argudiatu diete.
Bere jardun eremutik kanpo, udaleko zerbitzu juridikoen arduradunak Navarra Suma koaliziorako lanak egin ote zituen aztertzea izanen du xede Batzorde Bereziak. Udal gehiengoak, oposizioak, jarri du abian, apirilean EH Bilduk ezagutzera emandako ustezko kasu baten ondotik. Zabaldu zutenez, eskuineko hirukoaren konfiantzazko kargu horrek 30 ordu baino gehiago eman zituen udaletxeko ordenagailu ofizialetik eta lan-ordutegian Navarra Sumak Imarkoaingo hondakin-plantaren aurka aurkeztutako txostena egiten. Atzerapenagatik ere, azalpenak eskatzen jarraituko dutela azaldu du Buenok.
Oposizioari aurka egiten ari zaio atzerapenarekin Navarra Suma. Baina ez gai horretan bakarrik. Labriteko zaldaina konpontzeko diru gehiago bideratzea onartu zuen NA+k sanferminen bezperan, oposizioari aurka eginez.