Pozik hartu du familiak Nafarroako Gobernuak Aitor Etxarteri eginen dion aitortza. “Gehienbat euskarari aitortza bat egiten zaiolako”, zehaztu du Begoña Morenok. 63 urte zituela zendu zen koronabirusarekin, 2020. urtean. Hil ostean jasoko du beraz saria, eta hori sentitu du sendiak: “Haren gabeziaren absurdoa berriro berpiztu da gure artean”.
Aitor Etxarte pedagogoa zen eta beste hainbat pertsonarekin batera, Iruñeko Udal Ikastolaren sustatzaile eta bultzatzailea izan zen, beste gauza askoren artean. “Haren ekarpenak hezkuntzan eta hizkuntzan murgildu dira gehienbat”, gogoratu du Morenok. “Alor publikoan aritu zen gehien bat, eta proiektu askotan parte hartu zuen, publikoetan nahiz kooperatibetan. Euskararekin loturikoak ziren asko, baina gizartearen egoera hobetzearen aldekoak beste hainbat”.
