Hutsune eta eskari bati erantzun nahi dio Bertx(h)ori txapelketak. “Ikusi genuen Iruñeko ikasle giro euskaldun eta bertsozalean bazegoela demanda saioak antolatzeko eta esparru horretan saioak egon zitezen. Hori eskaini nahi izan dugu”, azaldu du Idoia Granizo egitasmoko kideak. NUPen sortutako bertso eskola izan da txapelketaren hazia: “Aurten taldetxo bat sortu da NUPen bertsotan aritzeko. Haietako asko hasi berriak dira, aurten hasi dira eta horiei ere eskaini zitzaien eroso egoteko moduko esparru bat”.
Bikoteka ariko dira txapelketan, eta hiru finalerdi eta final bat eginen dituzte. Gaur izanen da lehenengo saioa, Matalaz gazte gunean. Xabat Ilarregi-Eukene de los Aires, Beñat Astiz-Beñat Bilbao eta Ekain Alegre-Maddi Agirre ariko dira bertsotan, Jone Rubiok ezarritako gaien inguruan.
Hurrengoak Aintzina eta Monton tabernan izanen dira. Ostegunetan eginen dituzte saioak, guztiak 19:00etan. Saio bakoitzean hiru bikote ariko dira, eta bat sailkatuko da finalera. Martxoaren 31n ezagutuko dira txapeldunak. Finala non izanen den momentuz ez dute argitu.
