Xilema Fundazioak kudeatzen ditu Nafarroan adingabeen egoitzak. Profesionalen kopuruari dagokionez, plegua urria da; horretatik, pleguaren gainetik, arratsaldeetan bost hezitzaile laguntzaile gehitzea erabaki zuen enpresak. Arrazoi ekonomikoak argudiatuta, ordea, kaleratu berri ditu. Zerbitzuaren kalitatea murriztu dute, LAB sindikatuko Oihan Ataunen ustez: "Errebotez, jarraitzen duten gainerako taldekideei ordutegiak aldatzen zaizkie. Lankide hezitzaileek beren funtzioak eta lan-gainkarga areagotuko dituzte ",
Sindikatuak kritikatu duenez, Nafarroako Gobernuak "babesgabetasun-egoeran dauden adingabeen arreta-zerbitzuetan kalitatezko arreta bermatu gabe jarraitzen du", eta "oraindik ez du pausorik eman adingabeentzako gizarte-zerbitzuen baimenei, homologazioei eta funtzionamenduari buruzko dekretua arautzeko. 1991koa da indarrean dagoena.
Atzo elkarretaratzea egin zuten Xilema Fundazioaren aurrean; baina, aldarrikapena harago eraman nahi dute. Erantzule nagusia gobernua dela uste du sindikatuak, horregatik langileekin harremanetan dira exekutiboaren aurrean erantzun bateratua emateko.