Birjiñe Albira: "Auzoz auzo aztertu beharko luke udalak eremu urdina, baina ez dute planteamendu seriorik egin"

Javier Labairu Iruñeko Navarra Sumako zinegotziak Txantreako Auzo ekimena hartu du udaletxean eremu urdinaren gaia lantzeko. Ekimeneko kide Birjiñe Albirarekin mintzatu gara Iruñerrian Gaur.

Espero zuten bezala jazo da Iruñeko Udalarekin izan duten bilera: "Guk gurea bota genuen, beraiek beraiena, agur Ben-Hur eta kitto". Plataformak eremu urdina bertan behera uztea eta parte hartze prozesu bat martxan jartzea eskatu diote Navarra Suma udal taldeari. Javier Labairu zinegotziak, baina, hiriko testuinguruan kokatu nahi izan du afera: "Hiriko kontu bat dela dio, eta horregatik ezin dela eten". Auzo bakoitzean, bere bereizitasunak kontuan hartuz, jarduteko eskatu diote. 

Egun kotxea uzteko leku guztiak ordainpekoak direla, obrak dira nagusi auzoan. Bukatzen direnean 400 aparkaleku gehiago izanen dira. Eta auzotarrek diote, arazorik ez zuten lehen, hare gutxiago izanen lituzkete plaza berri horiekin; baina, urdinak izanen dira horiek ere. Gaur zuriz margotuta azaldu dira marrak.