Duela bi urte abiatu zuten Auzolanean, historia idatziz proiektua. Alde Zaharreko gizarte eta kultura ondare immateriala berreskuratu, aztertu eta zabaltzeko interesa zuen talde eragile bat eratu zuten, 1976-2021 urteetako mugarri garrantzitsuenak biltzeko. Orain liburu bilakatu nahi dute hori. Txutxin Almingol da kideetako bat.
Auzoko memoria bizi hori erreskatatzen duen eta, aldi berean, gogoeta egiteko eta etorkizunera begiratzeko balio duen liburu bat egin nahi dute. Helena Bengoetxea, kazetari eta errealizatzaileak hartu ditu ikerketa, erredakzioa eta liburuaren diseinuaren ardura.
700 ale argitaratu nahi dituzte, eta aukera balitz liburutik eratorritako hitzaldiak, jardunaldiak edota erakusketak antolatu. Hori posible egiteko finantzaketa kolektiboko prozesu bat martxan jarri dute, goteo.org webgunearen bitartez. Gutxieneko helburua 10.500 eurotan ezarri dute eta hiru egunetan 2.200 euro eskuratu dituzte. 38 egun geratzen dira ekarpenak egiteko.
