Astearte goizean hasi dira terrazak jartzen Iruñeko Konpainia plazan, horiek jantzeko baldintzak aztertzeko batzordea bildu baino ordu batzuk lehenago. Auzokideen haserrea eragin dute lanek eta denbora luzez eltzeei kolpeka aritu dira. 17:00ean elkarretaratzea eginen dute.
Enrique Maia alkateak onartu du akats bat izan dela plazan jarri dituzten terraza berrietarako baimenak ematea, eta ziurtatu du martxoaren 21era arte indarrean egongo den lizentzia berrikusiko dutela. Legez ezinezkoa bada, ez dute erabilera luzatuko lizentzia martxoaren 21ean amaitzen denean. Ohar berean esaten denez, terrazaren baimena urtarrilaren 21ean Kaldereria plazan mahaiak jartzearekin batera eman zen, "pandemiak sortutako egoeraren aurrean ostalaritza-sektoreari laguntzeko udalaren borondatean eta udal-araudian xedatutakoa betez".
