Zein da egoera?
Ultzama ibaiak atzo gainezka egin du. Inguruko parkeak hartu ditu. Ez da iritsi kaleetara eta etxeetara. Oraindik metro eta erdi bat falta zaio. Dirudienez, ez da iritsiko. Baina gauza hauek beti tentuz esan behar dira. Egia da atera dela, eta ikusgarri dagoela, baina, printzipioz, arriskurik gabe.
Aurrelarrialdi maila aktibatu du Nafarroako Gobernuak. Udaletik zer egiten ari zarete?
Plan bat daukagu egoera hauetarako, eta indarrean jarri genuen atzo. Lehena, arratsaldeko bostetan. Bi mezu klase zabaltzen ditugu halakoetan. Lehena, arretaz jokatzeko eskatzen duena. Bigarrena jada ondasunak babesteko gomendatzen duena. Kasu honetan lehena bakarrik zabaldu dugu. Fase horretan gaude, erne. Oso gertu dugu duela hilabete gertatutakoa eta bizilagun gehienek jada beren ondasunak babestu dituzte.
Duela hilabeteko kalte horiek oraindik nabariak dira herrian.
Bai, jakina, oraindik ikusten ditugu hainbat etxetako ormak erorita, kirol instalazioetan hainbat lan egiteko daude oraindik. Hainbat lurrazpiko aparkaleku oraindik ezin dira erabili.
Estatutik laguntzak iritsiko al dira?
Dirudienez bai. Ze bide, ze tramitazio erabiliko den ikusten ari gara orain. Ahalik eta lasterren hasi nahi dugu. Informe guztiak prest dauzkagu. Ea diru hori noiz eta nola iristen den.
