Uxue Dafauce: "Nafarroan bideo-joko sortzaile enpresa txiki eta profesional independente ugari dago"

Euskalerria irratia

Nafarroako Bideojokoen eta Sorkuntza Digitalaren VI. Jardunaldiak azaroaren 27an eta 28an egingo dira Baluarten. Ekitaldi honek bideojokoen inguruko komunitatea bilduko du eta adituen eskutik, tokiko zein estatuko ikus-entzunezko sektoreko joerak eta proiektu berritzaileenak ezagutzeko aukera izango da. Jardunaldien inguruan hitz egiteko, Nicdoko Uxue Dafaucerekin izan gara eta Zomorro Studioko  bideojoko-garatzaile Ibai Aizpurua.

Bideojoko zaleak, sektoreko profesionalak eta gaiarekiko interesa duen edonor dago gonbidatuta jardunaldietara. Egitaraua bi atal nagusitan banatuta dago. Batetik, hainbat postu jarriko dira, sortzaileek beren proiektuak aurkez ditzaten eta bertaratutakoek jokoak bertatik bertara probatzeko aukera izan dezaten. Bestetik, industriaren inguruko hainbat hitzaldi eskainiko dira, goizez zein arratsaldez.: "Ez dira masterclass hutsak izango, hitzaldi praktikoak eta interaktiboak izango dira", esan du Uxue Dafaucek. 

Postu horietako batean aurkeztuko du bere bideojoko berria Iñigo Aizpurua irundarrak, Zomorro Studio-ko kideak. Plastilinazko pertsonaiekin sortu du Gargartuan Chef  bideojokoa. Azpilikuetari bideojokoen etorkizunaz galdetu diogu eta aitortu digu erabiltzaileentzat datozen urteak oparoak eta interesgarriak izango direla ; garatzaileentzat, ordea, garai zailagoak aurreikusten ditu.

Nafarroako bideojokoen industria ere ezagutu dugu jardunaldien aitzakian. «Hazten ari den sektorea da. Oraindik ez dago enpresa handirik, baina enpresa txikiak eta sortzaile independenteak badaude», azaldu du Dafaucek.  Industria osasuntsu bat izateko, profesional onak egotea oinarrizkoa da, eta gaur egun Nafarroan zenbait aukera daude bideo-joko programazio eta diseinuan aritzeko. Besteak beste,  Nafarroako Unibertsitate Publikoak (NUP) bideojokoen garapenerako gradua jarri du martxan, sektoreko profesional berriak prestatzeko.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!