Hamaika urtez elkartasuna kozinatu ondoren, Lesbos utziko du Zaporeak elkarteak

Euskalerria Irratia

Oinarrizko beharra da jatea, baina batzuetan plater batek janaria baino askoz gehiago eskaintzen du: babesa, duintasuna, elkartasuna eta giza harremanak. Horixe izan da Zaporeak proiektuaren filosofiaren muina azken 11 urteotan. Zortzi milioi otordu gaindi eman dituzte egunero, baina iritsi da agur errateko ordua eta abenduaren 22an emango dute azken otordua.

Zortzi milioi otordu baino gehiago banatu eta 2.000 boluntariotik gora mugiarazi ondoren, Zaporeak elkarteak amaiera emanen dio Lesbosko sukaldeari datorren abenduaren 22an. Oraitz Garcia koordinatzaileak eta Elisa Huarte Nafarroako boluntarioak Euskalerria Irratian azaldu dituzte agurraren arrazoiak, eta azpimarratu dute proiektuaren muina plater bat janari emateaz harago joan dela.

Erabakiaren atzean hainbat faktore pilatu direla azaldu du Oraitz Garcia koordinatzaileak: batetik, Europako migrazio politiken gogortzeak eta mugetako murrizketek errefuxiatu zelaiko kopuruak hagitz aldakor bihurtu dituzte, eguneroko logistika eta aurreikuspenak zailduz; bertzetik, Karatepe eremuan sartzeko debekuak eta oztopoak pairatu dituzte. Horri guztiari hamaika urteko ibilbidearen higadura gehitu zaio, sei hilabeterako sortutako egitasmoa denboran luzatu baita. «Nekeak eta higadurak gain egin digu; jubilatu talde batek karga handia eraman du egunerokotasunean, eta merezi dute euren atsedena hartzea», adierazi du Garciak.

Lesbosko kanpamenduetako errealitate gordina bertatik bertara ezagutu du Elisa Ugarte boluntario iruindarrak, eta nabarmendu du elikadura duina bermatzearekin batera harremanak eta babesa izan direla egitasmoaren ardatza. «Kanpamendu horiek oso gogorrak dira, hor ezin da bizi; elkartasun keinu horren atzean dagoena maitasuna da», azaldu du Ugartek. Hala ere, pena agertu du proiektua itxiko delako migrazioaren arazoa konpondu gabe dagoenean, eta gogorarazi du egoera larri horri aterabidea ematea gobernuen ardura dela.

2016an Donostiako Intxaurrondo auzoan sortutako ekimen txikia herri proiektu zabal bihurtu da urteotan, Euskal Herrian eta Nafarroan egindako elikagai bilketei, Moriako sutearen ondotik bidalitako arropa trailerrei eta Fagorrek emandako sukalde berriari esker. «Proiektua ez zen bakarrik jaten ematea, otordu horiek besarkada eta irribarre bihurtzea baizik; Euskal Herri honek egin du posible Zaporeakek kozinatzen jarraitzea egunero», laburbildu du Garciak, egindako lanaz harro eta herritarrei «zapore goxoa» utzi dietelakoan.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!