Nafarroako Gobernuak Maestro Ávila talde ultraerlijiosoak Argiñanon duen eskolaren auzian esku hartu dezan eskatzeko mozioa onartu du Lizarrako Udalak. Santa María de los Milagros izeneko zentroak 3 eta 18 urte arteko 55 ikasle ditu, eta Nafarroako hezkuntza-sistematik kanpo jarduten du. Egoera horrek kezka sortu du udalbatzeko gehiengoaren artean.
EH Bilduk eraman zuen gaia osoko bilkurara, Gesalatzako eta Deierriko udalek onartutako mozioetan oinarrituta. Proposamenak PSNren, Geroa Bairen eta Zurekinen babesa jaso du. Ordea, UPN eta PP abstenitu egin dira. Mozioaren erdigunean, Maestro Avila sektaren eskuetan diren haur horien babesa dago. Mozioak, besteak beste, Nafarroako Hezkuntza eta eskubide sozialen departamentuei egoera argitzeko eta beharrezko neurriak hartzeko eskatzen dio mozioak.
Argiñanoko zentroak ez du Nafarroan irakasteko baimen edo aitortza ofizialik, eta AEBetako Michigan estatuko ikastetxe pribatu batekin duen hitzarmenaren bidez antolatzen ditu ikasketak. Hala ere, Carlos Gimeno Hezkuntza kontseilariak azaldu du Nafarroako Gobernuak ez duela jarduteko eskumenik: indarrean dagoen araudiak ez dio uzten ez zentroa ixtea, ezta zigorrik ezartzea ere.
Halaber, Maestro Ávila fundazioak Anderazko ikastetxe pribatu zaharraren eraikina erosi duela jakinarazi du, eta hezkuntza-jarduera bertara lekualdatzeko asmoa agertu du.