Lehen edizioak espazio sortzaile honen oinarriak ezarri ondoren, lehiaketak berriro gonbidatzen ditu sortzaileak ikuspegi askotatik emakumeen eta kirol tradizional honen arteko harremana aztertzera. Istorio pertsonalek, ikuspegi sozialek, proposamen artistikoek zein pieza dokumentalek izango dute tokia aniztasuna eta originaltasuna sustatzen dituen deialdi honetan. Lehiaketa 16 urtetik gorako pertsona guztiei irekita dago, banaka zein taldeka parte hartu ahal izango delarik, eta lanak edozein hizkuntzatan aurkez daitezke —betiere gaztelaniazko eta euskarazko azpitituluekin—. Film laburrek pilotaren edozein modalitate jorratu ahal izango dute (eskuz, palaz, zesta-puntaz, erremontez, xarez, erraketaz, laxoz, besteak beste), eta gehienez 60 minutuko iraupena izango dute.
Izena emateko epea 2026ko maiatzaren 1etik urriaren 30era egongo da zabalik, eta parte- hartzea doakoa da. Lanak antolakuntzak bere webgunean gaitutako formularioaren bidez bidali beharko dira. Ikus-entzunezkoen, pilotaren eta arlo sozialaren munduko profesionalek osatutako epaimahai batek hautatuko ditu finalista izango diren lanak. Lan horiek Emakumeak eta Pilota Zinema Erakusketaren III. edizioan proiektatuko dira, 2026ko azaroaren 21etik 23ra Iruñean ospatuko denean. Lehiaketak 200 euroko lehen saria, 100 euroko bigarren saria eta Publikoaren Saria aurreikusten ditu, azken hau erakusketan zehar egingo den bozketa bidez emango delarik. Gainera, hautatutako lanak proiektuaren artxibo ikus-entzunezkoaren parte izango dira, emakumeek pilotan izan duten presentzia eta memoria gordetzen eta zabaltzen lagunduz. Ekimen honen bidez, Napikek kultura, kirola eta berdintasuna uztartzen dituen espazio bat sendotzen jarraitzen du, emakumeek euskal pilotan historikoki izan duten protagonismoa berreskuratu eta itzultzeko helburuarekin. Proposamen ikus-entzunezko hauen bidez, lehiaketak haien ondarea ikusgarri egin, iraganeko papera aitortu eta gaur egun ere dagokien tokian kokatzen lagundu nahi du.