Oihan Ataun, Patxi Arratibel, Mikel San Argimiro, Xabier Beortegi, Iñigo Gonzalez, Beatriz Etxebarria eta Martxelo Otamendik erabaki dute pausua ematea. Ikerketa falta, torturatzaileekiko inpunitatea eta babesgabetasuna salatu dituzte: "Garbi dago zer esan dion lerro artean Giza Eskubideen Auzitegiak Espainiako justiziari:ezin duela segitu tortura ukatzen, asmakizuna balitz bezala. Oso serio hartu eta aztertu behar dituela tortura salaketak". Prozesua, torturak iker ditzatela eskatzen duenak, ez da hutsetik hasiko: "Orain arte egindako bideari eutsi eginen diogu eta behar den tokiraino iritsiko gara Espainia kargu egin arte egindako hutsegiteez", azaldu du Oscar Sanchez abokatuak. Estrasburgoko agindua iritsi eta ofizioz, berehala egin beharko lukeelako ikerketa lana torturak jasan zituztenen ustez, baina halakorik ez da izan: "Zazpi kondena ditugu, euskal herritarrek jaso dute aitorpena instantzia altuenetatik eta ez da ikerketarik ireki".
"Nahiz milaka kasu egon tortura salaketenak Espainiako Gobernuak ez du onartzen tortura existitu zenik ere", ohartarazi du Sanchezek. "Kasu bat huts geitea izan daiteke, bi kointzidentzia... hamar pertsonari eragiten dioten bederatzi kasu patroi bat dira", gaineratu du Sanchezek. "Milaka torturatzaileekin lerrokatu zen Espainiako Justizia sistemaren utzikeria pairatu zuten", azaldu du. Torturatuek argi dute: "Estatua demokratikoa balitz ez leudeke gaur agerraldi batean. Defizit demokratiko argi baten aurrean gaude. Torturak ezin dira zigorgabe geratu", salatu dute.
Otamendik gogorarazi du torturaren biktimak, bi aldiz direla biktima, gutxienez: tortura horiek jasandakoan eta tortura horiek ukatu zaizkienean. Aurrera pausoa emateko "ausardia eta kemena" izan dute zazpi torturatuk: "Orain eskatzen dugu biktimak behar duten unea delako, hori eskatzeko aukera ikusi dutelako zigorgabetasunaren eta preskripzioaren aurka dauden Nazioarteko erabakien ondoren". Beraz, Nazioarteko aginduak bete ditzala eskatuko diote Espainiako Justiziari. Ikertu gabe geratu dena, ikertzea, alegia. Finean, justizia aldarrikatzen ari dira.