Joan zen astean, sei egunez, goi-mailako tropela Euskal Herriko errepideetan barrena ibili zen. Itzulia ikuskizun iturri izan zen berriz ere, eta azpimarratzekoa izan zen, Paul Seixasek emandako erakustaldiaz harago, euskal txirrindularien jarduna. Ion Izagirre podiumaren atarian geratu zen, Alex Aranburuk etapa bat zakuratu zuen, eta Igor Arrieta ihesean nahiz sailkapen nagusian nabarmendu zen.
Arrieta garapen betean dago. 23 urte ditu, eta hirugarren denboraldia du World Tourrean; txirrindularitzako maila nagusian, alegia. Itzulian eskaini zuen maila mugarri izan daiteke bere ibilbidean. Hala azaldu du Uharte Arakilgo txirrindulariak Kirolerria saioan.