Emakume Master Cup zirkuituko Binakako Txapelketaren finala hartu zuen igandean Eibarko Astelena pilotalekuak. Arrizbalaga-Bergara eta Sagardui-Gaminde bikoteak izan ziren aurrez aurre, eta txapelak gazteek jantzi zituzten: Alize Sagarduik eta Enara Gamindek, alegia.
Beteranoek, ordea, kolpe gogorra jaso zuten, eta bereziki, Arrate Bergarak, ihes egin baitzion Binakako txapelketa nagusia lehen aldiz irabazteko aukerak. Emakume Master Cup zirkuituan aspalditik dihardu pilotari tuterarrak, eta bidean hainbat txapel lortu dituen arren, oraindik ez du lortu eliteko binakakoan nagusitzerik.
Bere ibilbideaz eta emakumeen eskupilotak izan duen garapenaz galdetu diogu Kirolerrian. Gaur egungo pilotan emakumezko erreferenteak daudela goratu du, eta pertsonalki, uste du etorkizunean azken bi urteetan galdutako finalen arantza ateratzeko aukera izango duela.