Bosgarren aldiz eginen dute Iruñerriko Mintzodromoa: "Ez hasieran bezain prekario, baina bai hasierako ilusio berarekin", adierazi du Zubiarte Euskaltegiko zuzendari Ainhoa Madariagak. Euskara, erdigunera ekarriko dute. Baluarten eginen dute "harreman sareak zabaltzeko" baliagarria izan nahi duen euskaldunen topagunea.
Euskarabideak parte hartzen du duela hiru urte antolaketan eta Iruñeko Hizkuntza Eskola Ofiziala, Zubiarte Euskaltegiak, AEK eta IKA zein Taupa Mugimendua ari dira prestatzen. "Euskara ikasten ari direnentzat espazio seguru bat osatzen ahalegintzen gara mintzodromoarekin: konfiantzan aritzeko euskaraz eta konplexurik gabe. Gakoa baita erabilera sustatzea", azaldu du Jabi Arakama Euskarabideko zuzendariak. Elkarlana goraipatu dute:"Euskara indartzeko bidean ezinbestekoa da elkarrekin egitea bidea. Giro ezin hobea sortu eta euskaraz aritzea da mintzodromora gonbidapena", esan dute Madariagak eta Arakamak. Aurten ere gonbidatu bereziak eta zozketak izanen dira: Sarai Robles bertsolaria, Julen Goldarazena Flako Fonki abeslaria eta Goxuan Salsa taldeko Claudia Rodriguez musikaria, Exprai marrazkilaria eta Oskar Alegria zinemagilea izanen dira.
Euskalerria Irratiak ere parte hartuko du V.Mintzodromoan
Miren Mindegia eta Unai Lako Euskalerria Irratiko kazetariek izanen dute ardura giroa berotu eta bertaratutakoak xaxatzeko. Apirilaren 22an hartuko du Baluarteko aretoak Iruñerriko bosgarren mintzodromoa. Doakoa da parte hartzea eta A1 mailatik hasitako herritarrek eman dezakete izena. 120 lagun inguru hartzen dituen espazioan arituko dira. 4-5 laguneko taldeak osatu eta proposatuko duten gai bati buruz hitz egitea izanen da gakoa, finean, euskara erabiltzea.