Iruñerriko euskal komunitatea astintzea eta euskara biziberritzea, besta aldarrikatzaile baten bitartez. Horixe izanen da larunbatean Euskal Herrian Euskaraz elkarteak antolatu duen Euskaraz Bizi Egunaren asmoa. Eguerditik abiatuko da egitaraua, hainbat eragile internazionalistek eta antiinperialisten deituriko NATO-ren kontrako manifestaldiaren parte-hartzearekin. Ondoren, giro alaiarekin jarraituko du egunak, Joseba Ganboa EHE-ko kideak azpimarratu bezala, "besta eta aldarrikapena ez direlako kontrajartzen". Trikipoteoa eginen da Nabarrerian barna, eguerdian Zaldiko Maldikon eginen den bazkarira arte.
Ganboak berak azpimarratu bezala, oraindik ere badago bazkarian izena emateko tartea, leku gutxi batzuk besterik gelditzen ez badira ere. Horretarako, 648172899 zenbakira idatzi daiteke. "Kantu bazkaria izango da, giro ona ziurtatuta dago". Giroak, hala, arratsaldean jarraituko du aurrera, Elektropikalak taldearen elektrotxarangarekin, Jarautako Aitzina tabernan. Bertan izanen dira, halaber, gauari jarraipena emanen diotenak. 20:30ean DJ-ak eta jokuak eginen dira, eta Arima Zaurituak eta DJ Disfrutona ta Kimera-ren emanaldiekin. "Iruñean saltsa badagoela erakutsiko dugu", borobildu du Ganboak.