Oro har, irudi eskasa eman zuten nafarrek jaitsiera postuetan zegoen Mallorcaren kontra. Ezin izan zuten ezarri Sadar dar-darka jartzen duen erritmo biziko futbola, eta gainera, akats larriak egin zituen defentsan. Sergio Herrerak oso gol inozoa oparitu zuen lehen zatian, eta bigarrenean, Osasunari kontraeraso batean iritsi zitzaion zigorra. Vedat Muriqik sartu zituen Mallorcaren bi golak.
Lehen itzuliko neurketan ere 2-0 ipini zen Mallorca, Muriqi golegile izanik. Eta orduan bezala, larunbatean Osasuna gai izan zen bere onera etortzeko. Lisciren aldaketa arraroek haize berriak ekarri zituzten Sadarreko berdegunera, eta bi taldeak hamar jokalarirekin zirela, Barjak eta Budimirrek orekatu egin zuten markagailua. Hori gutxi ez, eta partida irabazteko zorian izan ziren gorritxoak.
Azkenean, ordea, ezin izan zuten mirara biribildu. Sailkapenean ez dute jauzirik egin, baina gutxienez, eutsi egin diote jaitsiera postuekiko duten aldeari.
Emakumeek, berriz, bi asteburu daramate ligako lehiarik jokatu gabe. Iragan ostegunean lagunartekoa izan zuten Lehen Mailako Eibarren aurka, eta armaginak izan ziren nagusi, 1-0. Osasuna larunbat honetan izango du hurrengo partida ofiziala, Albaceteren aurka.
Hori guztia mintzagai Kirolerriko Osasun-etxean.