Faxismoari aurre egin, eta karrikak hartzeko deia luzatu du Gazte Koordinadora Sozialistak. Iruñean ez ezik, Bilbon ere mobilizatuko da gazte antolakunde komunista, datozen hilabeteetan garatzen segituko duten borroka antifaxista sendotzeko eta Euskal Herrian «ultra-eskuina geldiarazteko gai izanen den euste horma eraikitzeko».
Edurne Abaigar GKSko bozeramailearen erranetan, «agerikoa da alderdi faxisten gorakada Europan, bai ordezkaritza instituzionalean, bai sare sozialetan duten indarrean, eta baita karriketan erakusten duten bortizkerian ere». Testuinguru horren aitzinean, gazteek antolatzea «baitezpadakotzat» jo dute, «jarrera arrazistak, matxistak eta autoritarioak hauspotu dituen oldarraldi erreakzionarioari» aurre egiteko.
Abaigarrek ohartarazi du «faxismoa ez dela fenomeno iragankor bat». Haren esanetan, Mendebaldeko oligarkiek estatu autoritarioen aldeko apustua egiten dute, langileen bizi-baldintzak okertuz eta poliziaren errepresioa areagotuz, besteak beste. GKS Gazte Koordinakundeak jakinarazi du mobilizazio hau ez dela ekimen bakarra izanen, eta datozen hilabeteetan bestelako jarduera antifaxistak ere garatuko dituztela.