Elizabeth Cochran Seaman, Nellie Bly izenez ezagunagoa, Ameriketako Estatu Batuetan jaio zen 1864an, Pensylvanian, eta 1922ko urtarrilaren 27an zendu zen; beraz, gaurko egunez, duela 96 urte. Gaztetan, kazetaritza ikasteko izena eman zuen unibertsitatean, baina utzi behar izan zuen diru faltagatik.
Behin, bere herriko egunkarira “Zuzendariari gutuna” bidali zuen izengoiti batekin. Zuzendaria liluraturik geratu zen eskutitzaren mailagatik, eta anonimoa zen idazlea berarekin harremanetan jartzeko iragarki bat plazaratu zuen egunkarian. Horren eraginez, Elizabethek, lan bila baitzebilen, zuzendariarekin hitz egin zuen, eta segituan kazetari lanean hasi zen.
Zuzendariak berak Nellie Bly izengoitia erabiltzera bultzatu zuen, Stephen Foster konpositorearen izen hori zeukan abestiaren omenez. (Konpositore horrek “Oh, Susana” abestia ere idatzi zuen). Elizabetehek onartu zuen, eta geroztik bere artikulu guztiak Nellie Bly izenpean kaleratu zituen.
Hainbat ikerketa-artikulu idatzi ostean, emakumeentzako sailera bideratu zuen zuzendariak. Hori ez zitzaion batere gustatu. Horregatik, egunkaria utzi, eta New Yorkera joan zen bizitzera. Han Joseph Pulitzerren egunkarian hasi zen lanean. Pulitzerrek eginarazi zion lehenengo lana emakumeentzako asilo psikiatrikoari buruzko artikulu bat idaztea izan zen.
Artikulua idazteko, eritasun mental bat zuela itxurak eginda, erietxe psikiatriko batean sar zezaten lortu zuen. Hamar egunean erietxeko egoera onartezina sufritu ondoren, bizipenak egunkarian azaldu zituen. Kasua epaitegietara iritsi zen, eta erietxeko kondizioak hobetzea erabaki zutenean, kazetariaren gomendioak aintzat hartu zituzten.
Horrelako kazetaritza, ezkutuko kazetaritza zena, bere estilo berezi bihurtu zen; baita ordura arte gizonek bakarrik egiten zituzten proiektuei ekitea ere.
1890ean, Nellie Blyk Julio Verneren Phileas Fogg pertsonaiaren bidaia errepikatu nahi izan zuen, munduari 80 egunean bira osoa ematea, hain zuzen. Eta horrela adierazi zien egunkariko arduradunei.
Haiek ez zuten oso garbi ikusten, emakume batek ezin zuelako bakarrik bidaiatu eta, gainera, ekipaje gehiegi beharko zuelako. Hori entzunda, Nelliek esan zien gizon bati emateko proiektua, beste egunkari batentzat egingo baitzuen berak. Hitz haiek nahikoak izan ziren baietza lortzeko.
Urte bat geroago New Yorketik atera zen. Berak ez zekien baina konpetentziako beste egunkari batek Elizabeth Bisland kazetaria bidali zuen, Phileas Foggen eta gure Nelly Blyen marka hobetzeko.
Baina ez zuen lortu, gure Nellyk fikziozko balentria hobetu egin baitzuen, eta Foggek baino zazpi egun gutxiago behar izan baitzituen planeta inguratzeko.
Bidaian zehar kronikak bidali zituen, Julio Verne ezagutu zuen, eta hamaika abentura bizi izan zituen. Bere izena ospetsua egin zen.
Handik bost urtetara, Robert Seaman aberatsarekin ezkondu zen, eta, aldi berean, kazetaritzatik urrundu zen. 9 urte eman zituzten elkarrekin, senarra hil arte. Eta hori gertatu zenean, senarraren enpresaren zuzendaritza hartu zuen, eta horietan osasun-erreformak egin zituen, ordutegiak aldatu zituen, eta soldata bidezkoagoak ezarri zituen. Langileak oso kontent zeuden berarekin.
Tamalez, enpresak porrot egin zuen, eta, horren ondorioz, Nellyk kazetaritzara bueltatu behar izan zuen berriro ere. Orduan, New Yorkeko Evening Journal egunkarian idazten hasi zen.
Emakumeen sufragioaren aldeko 1913ko konbentzioaren berri eman zuen.
Beste alde batetik, Europara bidaiatu zuen Lehen Mundu Gerran, eta berriemaile gisa jardun zuen ekialdeko frontetik. Hori zela eta, gerrako lehen emakume korrespontsaletako bat bihurtu zen.
Nelly Bly 57 urterekin hil zen, pneumoniak jota. 1929an hil zen beste kazetari ospetsu baten hilerri berean dago lurperatuta: Elizabeth Bisland, Blyrekin munduari bira emateko lehian aritu zena, alegia.