Irabazi beharreko partida zen gorritxoentzat, oso gertu entzuten baitzuen jaitsieran daudenen arnas hotsa. Bada, ez zuten hutsik egin, eta merezitako garaipena eskaini zieten zaleei. Aukera garbi asko izan zuten neurketa osoan zehar, baina 72. minutura arte itxaron behar izan zuten lehen gola ospatzeko.
Ordura arte, heroi mozorroa jantzi zuen Siverak, Alavesen atezainak. Sergio Herrerak lan gutxiago izan zuen, baina halere, bigarren zatian gelditu erabakigarria egin zion Toni Martinezi. Arabarrek alferrik galdu zuten 0-1 ipintzeko aukera, eta azkenean, bere legea ezarri zuen Budimirrek.
Lehen gola, bolea ikusgarri batekin sartu zuen kroaziarrak, punpa laster; eta bigarrenean, Sivera maisuki gainditu zuen penalti puntutik. Festak eztanda egin zuen Sadarren, eta Raulek ginga jarri zuen, luzapenean hirugarrena eginda.
Garaipenaren ondotik, Osasunak bost postu igo ditu sailkapenean: 17. zegoen lehen, eta 12. dago orain. Jaitsiera postuak hiru puntura utzi ditu, eta hurrengo partida urtarrilaren 3an jokatuko du, etxean, Athleticen aurka.
Horren guztiaren inguruan mintzatu gara Kirolerriko Osasun-etxean.