Naturalki eman den itzulera bat izan da Latzen taldearena. Adinaren, esperientziaren eta musikarako zaletasun zintzoaren egiazkotasunetik emandako urratsa. Hala aitortu digu Gorka Lazkano bateria jotzaileak berak: "Besterik gabe, egun batean etxean nengoen akorde batzuk jotzen, eta Aitorri hotsegin nion. Zer, egingo dugu zerbait, ezta?". Lehen pausua emanda, diskoa osatzea zen hurrengoa. Aspaldian baztertutako abesti batzuk berregin, berri batzuk sortu eta grabaketa estudiora eramatea izan zen ondoren etorri zena. Horretarako Silverstar Studiosera jo zuen taldeak, Iker Bengoarekin. "Berak beste ikuspegi bat eman digu, argi esan zigun: 90eko Latzen horren soinua duten kantuak 2025era ekarri behar ditugu".
Soinu hori dauka, hartara, hamar kantuz osatu duten Denboraren orbainak diskoak. Oinarria eta izpiritua mantenduz gaurkotu den banda batena. Jarraitzaileak itzulera gogoz zeudela nabarmena da. Izan ere, Euskal Herrian emango dituzten lehenengo kontzertuetarako sarrera guztiak agortu dira ia: bai Atarrabiakoan, baita Bilbon, Gasteizen eta Azpeitian emanen dituztenetakoa; nahiz eta Biarritzeko Atabalen emanen dutenerako oraindik gelditzen diren. Lazkanok, hala ere, kontzertu gehiago emanen dituztela iragarri du gurean. "Eszenatokian dena eman eta hustutzeko gogoz gaude, gure publikoa bete dadin", adierazi du.