Pobreziaren eta gizarte bazterketaren kontrako Nafarroako sareak 2026rako Nafarroako Aurrekontu Orokorren Aurreproiektuarekiko balorazioa egin du eta eskasa iruditu zaio. Ez baitu apustu eraldatzailerik proposatzen desparekotasunaren aldeko borrokan.
Aurrekontuen hazkundea “epela” izan dela iritzi diote. Izan ere, Barne Produktu Gordinaren (PIB) igoera argia izan da, %2,4koa, baina, Nafarroan 124.000 pertsona pobrezia edota gizarte bazterketa egoeran bizitzen jarraitzen dute. Gara Gonzalez Pobreziaren Sareko kideak aitortu du, "bultzada falta hori aukera galdu bat da desparekotasunarekin eta pobreziarekin bukatzeko".
Hartara, "hobekuntza ekonomikoak ez du esan nahi pobrezia murrizten ari denik”. Politika publikoaren eraginkortasuna eta norabidea zalantzan jartzera eramaten du horrek. Eta Nafarroako Pobreziaren Sareak uste du aurkeztutako aurrekontuek izaera “jarraikor” bat besterik ez dutela, eta "murrizketa-sentsazioa" deritzona sortzen dutela.
Bazterketa eta pobreziari aurre egiteko borrokaren aldeko konpromisoa eskatu dio sareak Foru Gobernuari. “Ausardia” eta baliabideak eskatu dizkiote exekutiboari “inor ez dela atzean geratuko bermatzeko”.