Belateko tunelak eraikitzeko aldi baterako enpresa-elkartetik kanpo gelditu da Servinabar. Antxon Alonso enpresaburuak zuzendutako enpresa horretan, Santos Cerdan PSOE-PSNko buruzagi ohiak izan zezakeen parte hartzea ikertzen ari dira. Izan ere, Servinabarren akzioen %45 Cerdanek eskuratu zituela baieztatzen dute Guardia Zibilak legebiltzarkide nafarraren etxean atzemandako dokumentu batzuek.
Joan den ekainean zapartatu zen PSOE-PSN inarrosi zuen ustelkeria kasua, eta ordutik, Acciona Construcciones eta Excavaciones Fermín Osés enpresek jakinarazi dutenez, Alonsoren enpresak Belateko proiektuan zuen parte hartzea etenda gelditu zen, dena argitu bitartean. Hiru hilabete geroago, ordea, Acciona Construcciones eta Excavaciones Fermín Osés enpresek Servinabarren kanporatzea formalizatu dute Belateko tunela bikoizteko obren esleipena jaso zuen aldi baterako enpresa-elkartetik.