Piztu dira fokoak eta zabaldu dira alfonbra gorriak Donostian, Zinemaldiaren 73. edizioaren karietara. Izarrez, zinemazaleez eta giroak erakarrita hurbiltzen diren norbanakoez lepo bete da Gipuzkoako hiriburua. Irrintzi Dorretik ere erreparatu nahi izan diogu zinemaren jaialdi erreferentziazkoari. Gure belarriak eta begiak dira bertan lanean ari diren kazetariak, tartean Argia aldizkariko Gorka Peñagarikano. Zinemaldia bere ekuatorrera iristen ari denerako hamar bat film ikusi ditu, eta beste bezainbeste gelditzen zaizkio aurretik.
Orain artekoen artean, euskal ekoizpeneko filmak nabarmendu nahi izan ditu Peñagarikanok. "Alauda Ruiz de Azuaren Los Domingos-ek arreta bereziki deitu dit", adierazi du. Zuzendari barakaldarraren filmak moja sartzeko erabakia hartzen duen protagonistari jarraitzen dio. "Kristautasunaren aldeko hautua hartzeak askorentzat tonu erridikuloa ere izan dezake, baina berak oso modu errespetagarrian tratatu du gaia". Asier Altunaren Karmele eta Moriarti ekoiztetxearen Maspalomas ere aipatu ditugu kazetariarekin. "Zalantzarik gabe, Maspalomas filma zer esan emango duen lan horietako bat izango da".